Faqja jonë përdorë "cookies". Në momentin që pranoni këtë, pajtoheni me kushtet e përdorimit të portalit 07 Press. 

Përmbytje në Shqipëri: Mbi 1 mijë e 700 hektarë nën ujë, një rrugë e bllokuar

Përmbytjet që kanë prekur Kosovën, kanë shkaktuar pasoja edhe në Shqipëri.

Qendra Kombëtare Operacionale e Emergjencave Civile bëri të ditur se si pasojë e prurjeve të shumta, vazhdon shkarkimi i kontrolluar në kaskadën e Drinit me 300 metër kub për sekondë.

Sipas autoriteteve, lumenjtë janë nën nivelin kritik dhe nuk përbëjnë rrezik për përmbytje në zona të tjera.

Në veri të Shqipërisë, reshjet e borës kanë shkaktuar disa probleme. Rruga Bogë-Theth është e bllokuar si pasojë e orteqeve dhe ndërhyrja është e pamundur. Ndërsa Rruga e Arbrit – e cila lidh Shqipërinë me Maqedoninë e Veriut – që u bllokua ditën e djeshme për shkak të borës, sot është e kalueshme.

Emergjencat Civile njoftuan se të shtunën, më 21 janar, u bllokuan në malin e Tomorrit (në qarkun e Beratit) pesë makina me turistë vendas, ndaj ky institucion bëri apel që të shmangen destinacionet ku ka prezencë bore dhe akulli në rrugë.

Reshjet kanë dëmtuar katër ura në qarqet Shkodër dhe Lezhë.

Sipas të dhënave nga Ministria e Mbrojtjes së Shqipërisë pritet që sot dhe nesër të ketë reshje shiu, çka mund të përkeqësojë situatën.

Përveç Shqipërisë, dëme nga vërshimet janë shkaktuar edhe në disa komuna të Kosovës./REL