Presidenti turk Recep Tayyip Erdogan, i ka shkruar një letër falënderuese presidentes së Kosovës Vjosa Osmani, për ndihmën që Kosova ka dhënë pas tërmetit vdekjeprurës në Turqi.
Presidenca e Kosovës ka publikuar letrën ku presidenti turk ka falënderuar në emër të tij dhe popullit turk, për mbështetjen që ka dhënë vendi ynë.
“Do të doja t’ju falënderoja në emër të kombit tim dhe emrin tim personal që keni ndarë dhimbjen tonë dhe keni dhënë mbështetje në një kohë të shkurtër duke dërguar mesazh ngushëllimi për tërmetet në Kahramanmaraş, të cilët prekën drejtpërdrejt dhjetë provinca me një fuqi shkatërruese që shkaktuan dhimbje të thellë për vendin tonë. Fakti që vendet mike na qëndrojnë pranë në raste të tilla të fatkeqësive natyrore na jep forcën për të duruar,”- ka shkruar Erdogan.
Më tej në letrën e presidentit Erdogan thuhet se ndihma e Republikës së Kosovës ka dhënë një kontribut të madh për njerëzit që po luftojnë me efektet tronditëse të tërmetit.
“Ndihma juaj ka dhënë një kontribut të madh për njerëzit tanë që po luftojnë me efektet tronditëse të tërmetit në këto ditë të vështira dimri. Përpjekjet e ekipit tuaj të kërkimit dhe shpëtimit për të shpëtuar jetët e njerëzve të bllokuara në rrënojat do të kujtohen gjithmonë me mirënjohje”.
Erdogan e ka përfunduar letrën e tij duke e quajtur popullin e Kosovës, popull mik e vëllazëror.
“Me këtë rast përsëris urimet e mia më të mira për shëndetin dhe lumturinë tuaj, si dhe për mirëqenien dhe prosperitetin e popullit mik e vëllazëror të Kosovës.”