Inspektorati Policor i Kosovës (IPK) ka bërë të ditur se ka nisur hetimet për një rast i cili është raportuar nga organizata “Opre Roma Kosova” se një qytetar i komunitetit rom, Burhan Ibrahimoviq, ishte sulmuar fizikisht nga zyrtarët policorë derisa merrej në pyetje.
Në njoftimin e “Opre Roma Kosova” thuhet se ata do të mbajnë më 29 gusht një protestë nga ora 11:00 në Graçanicë.
“Protesta vjen si përgjigje ndaj një incidenti që ndodhi në Graçanicë të shtunën, më 18 gusht 2023. Incidenti përfshiu Burhan Ibrahimoviq, një pjestëar i respektuar i komunitetit rom. Ibrahimoviq është dërguar në stacionin policor lokal pas akuzave për një konflikt me një banore të Graçanicës. Por, ajo që duhet të ishte një procedurë rutinë për të mbledhur të dyja anët e historisë mori një kthesë shqetësuese”.
“Burhan Ibrahimoviqit, me të mbërritur në stacionin e policisë, në mënyrë tronditëse iu mohua mundësia për të dhënë deklaratën e tij në lidhje me konfliktin e supozuar. Në vend që t’i jepej një shans i drejtë për të paraqitur këndvështrimin e tij, atij iu dha një gjobë – veprim ky që ngriti menjëherë shqetësimet për qëllimet e autoriteteve. Situata mori një kthesë edhe më të rëndë kur një grup prej 4-5 zyrtarësh policor në stacionin policor të Graçanicës e shoqëruan Burhanin në një dhomë të veçantë. Në atë që mund të përshkruhet vetëm si një shpërdorim i tmerrshëm i pushtetit, ai iu nënshtrua dhunës brutale fizike, një shkelje që shpërfill në mënyrë flagrante të drejtat e tij themelore njerëzore. Incidenti e la Burhanin të rrahur dhe të mavijosur, si fizikisht ashtu edhe emocionalisht”, thuhet në njoftim.
Opre Roma Kosova dëno këtë akt dhune dhe solidarizohet me Burhan Ibrahimoviq dhe gjithë komunitetin rom në Kosovë.
“Ky incident nënvizon çështjet sistematike brenda kuadrit të zbatimit të ligjit dhe nxjerr në pah nevojën urgjente për reforma. Lëvizja beson fuqishëm se çdo individ, pavarësisht nga prejardhja e tij, meriton të trajtohet me dinjitet, drejtësi dhe respekt”.
“Protesta paqësore do të mbahet para stacionit policor të Graçanicës, duke filluar nga ora 11:00. Opre Roma Kosova kërkon pjesëmarrjen dhe mbështetjen e autoriteteve lokale, organizatave ndërkombëtare, mediave, grupeve të shoqërisë civile dhe qytetarëve të interesuar që të qëndrojnë së bashku për drejtësi, barazi dhe të drejtat e njeriut”.