Në Dhomat e Specializuara të Kosovës (DhSK) në Hagë po vazhdon dëshminë e tij Gjergj Dedaj, i cili është dëshmitari i 33-të me radhë në çështjen gjyqësore ndaj Hashim Thaçit, Kadri Veselit, Jakup Krasniqit dhe Rexhep Selimit.
Me fillimin e dëshmisë së tij, Dedaj tha se ka kërkuar që seancat të jenë të mbyllura që të mos iu rrezikohet e ardhmja dhe familja e tij.
“Unë kam të drejtë me protestu sepse unë resposible, unë jam përgjegjës për fatin e fëmijëve të gjeneratave, mbesave e nipave të mi dhe për këta duhet me pas konsideratë. Kam kërku gjatë bisedave me ju që seancat të jenë të mbyllura për mos me ma rreziku të ardhmen dhe familjen në Kosovë. Nëse qëllimi i kësaj gjykate është vetëm me nxjerrë çka keni dëshirë dhe të ndodhë çkado me Kosovën, na hapni plagë të reja, ajo është tjetër gjë”, tha Dedaj.
Marrjen në pyetje të Gjergj Dedajt, po e vazhdon Zyra e Prokurorit të Specializuar. Ai u pyet lidhur me vizitën në Qirez dhe se a kanë mbajtur fjalim atë ditë apo kanë folur me popullatën individualisht.
“Ne për me bisedu me ta kemi shku, me i pa problemet e tyre, hallet e tyre nën terrorin serb”, tha Dedaj.
Dedaj tha se ata si delegacion nuk kanë bërë incizime, por ka mundur ta bëjë një gjë të tillë dikush prej gazetarëve.
“A e kanë incizu, unë nuk i kam kontrollu ata. Sepse ne si grup-delegacion nuk kemi bërë asnjë incizim. Ka mujtë dikush prej gazetarëve me incizu se është e lejushme që me e ba punën e vet se ne e kemi pas vizitën humanitare”, tha Dedaj.