Presidenti i Serbisë, Aleksandër Vuçiq, ka propaganduar gjatë fjalës së tij në Këshillin e Sigurimit të OKB-së.
Ai tha se situata në Kosovë po bëhet e vështirë për serbët, pas vendimit të BQK-së për ndalimin e dinarit serb, teksa e akuzoi Kosovën për sulme dhe destabilizim të rajonit.
Me vendimin për ndalimin e dinarit, Vuçiq tha se Kosova po krijon “kushte të padurueshme të jetës për serbët në Kosovë”, duke akuzuar Prishtinën se po kryen “sulme të përhapura sistematike” ndaj serbëve që jetojnë në Kosovë.
“Në një situatë të tillë, pa një reagim të duhur, mund të shkaktohet një dëm i pariparueshëm për mbijetesën e popullit serb në Kosovë”, tha ai.
Sipas Vuçiqit, rregullorja e BQK-së është “goditje ndaj mbijetesës së serbëve dhe themelimit të Asociacionit” të komunave me shumicë serbe në Kosovë.
“Me vendimin për të ndaluar transaksionet për dinarin, regjimi në Prishtinë në mënyrë të drejtpërdrejtë ndalon çdo operacion në të gjitha institucionet shëndetësore, arsimore, sociale dhe kulturore, që u mundësojnë serbëve që të kenë gjërat bazë”, tha Vuçiq.