Kryeministri i Malit të Zi, Milojko Spajiq, ka konfirmuar se s’do të ketë çnjohje të Kosovës.
Në një intervistë për median gjermane Berliner Morgenpost (BM), Spajiq ka thënë se qëndrimi i Malit të Zi, që ka njohur Kosovën, më 2008, nuk do të ndryshojë.
Në këtë intervistë, Spajiq akuzoi Rusinë se po mbjell kaos në rajon.
“Ne e duam Serbinë. Është vendi ynë fqinj dhe një partner i rëndësishëm tregtar. Rreth 40% e turistëve te ne janë serbë etnikë. Është shumë e rëndësishme për ne që të mbajmë marrëdhënie të mira me Serbinë. Megjithatë, ne nuk do të heqim dorë nga synimet tona strategjike, rruga jonë evropiane, anëtarësimi në NATO dhe vazhdimi i njohjes së Kosovës”, ka thënë ai duke konfirmuar se s’do të ketë çnjohje të Kosovës.
Spajiq, ka thënë se Mali i Zi do të luajë rol të rëndësishëm në përafrimin e marrëdhënieve midis vendeve në Ballkanin Perëndimor.
Më herët, edhe ish-kryeministri i Malit të Zi, Dritan Abazoviq, pati thënë se Mali i Zi nuk ka plan të tërheqë njohjen e pavarësisë së Kosovës.
Çështja e Malit të Zi u bë e zëshme për Kosovën edhe rreth anëtarësimit në Këshillin e Evropës.
Më 27 mars, Maja Vukiqeviq, kryetare e delegacionit malazias në Komitetin për Politikë dhe Demokraci në Asamblenë Parlamentare të Këshillit të Evropës (PACE), votoi kundër propozimit që Kosova të bëhet anëtare e Këshillit të Evropës.
Vukiçeviq është anëtare e Partisë Popullore Demokratike (DNP) pro-ruse në parlamentin malazias, njëherësh deputete e ish-Frontit Demokratik, agjenda e të cilit përfshinte tërheqjen e njohjes së pavarësisë së Kosovës, heqjen e sanksioneve kundër Rusisë dhe daljen e Malit të Zi nga Organizata e Traktatit të Atlantikut Verior (NATO).
Partia e saj e konsideron Kosovën si pjesë të Serbisë, duke e quajtur atë “shtet të rremë” dhe “territor të pushtuar përkohësisht”.
Megjithatë, Ministrja për Çështje Evropiane e Malit të Zi, Maida Gorçeviq gjatë qëndrimit në Prishtinë, pati thënë se Mali i Zi do të votojë pro Kosovës.
Si përfundim, Raporti për Kosovën i Dora Bakoyannis për anëtarësimin në Këshill të Evropës ka kaluar me sukses edhe hapin e dytë në Asamblenë Parlamentare, duke mbetur kështu vetëm hapi final, mundësia e tij e parë më 16 maj.
Shumica e deputetëve të Asamblesë Parlamentare të Këshillit të Evropës mbështeti anëtarësimin e Kosovës në këtë organizatë me seli në Strasburg.
Shumica e deputetëve të Asamblesë Parlamentare të Këshillit të Evropës mbështeti anëtarësimin e Kosovës në këtë organizatë me seli në Strasburg.