Pas arrestimit të dy zyrtarëve të lartë të MINT dhe një njeriu të afërt të Kryeministrit të Kosovës, Albin Kurti, Ridvan Muharremin, në lidhje me aferën e vajit dhe gruri – ku 300 mijë euro janë paguar për vaj në Rezervën Shtetërore, mall ky i cili s’ka ardhur kurrë ndonëse paratë janë dhënë, Prokuroria Speciale e Kosovës ka konstatuar se përveç procedurave të paligjshme të ndjekura gjatë blerjeve të rezervave shtetërore, janë evidentuar edhe shkelje të tjera, pasi mallrat e paguara nuk janë dorëzuar në territorin e Kosovës.
Sipas dokumentit të Prokurorisë, i publikuar nga “Betimi për Drejtësi”, pavarësisht pagesave të kryera për grurë, vaj dhe sheqer te kompanitë turke dhe polake, nuk është realizuar asnjë furnizim i 200 mijë litrave vaj, 120 mijë kilogramëve sheqer dhe 52.5 tonëve grurë në Kosovë.
Sipas Prokurorisë, malli që s’arriti kurrë në Kosovë kap vlerën e 600 mijë eurove.
Në dosjen e Prokurorisë, konstatohet që biznesmeni Ridvan Muharremi ka qenë figura kyçe në zhvillimin e negociatave me operatorë ekonomikë për blerjen e grurës, vajit dhe sheqerit.
Për çka dyshohet Ridvan Muahrremi?
Ridvan Muharremi, sipas akuzave të Prokurorisë, është akuzuar për ndihmën e tij në shkeljen e ligjit nga zyrtarët Irfan Lipovica dhe Haviz Gara. Ai akuzohet për krijuar kushte të kundërligjshme që të ndihmonte në negociatat e tyre me kompanitë turke dhe polake për blerjen e grurit, vajit dhe sheqerit.
Sipas akuzave të Prokurorisë, Muharremi kishte arritur të negocionte blerjen e 10 tonëve grurë nga Turqia, me një vlerë prej 4 milionë 834 mijë e 778 euro.
Muharremi, bazuar në akuza, del të jetë figura kyçe në të negociuarit e kushteve të kontratave me operatorët ekonomikë për blerjen e rezervave shtetërore.
Gjithashtu, Muharremi më parë kishte pasur marrëveshje kontraktuale dhe marrëdhënie biznesi me këto kompani.
“Dhënie e ndihmës në kryerjen e veprës penale të keqpërdorimit të pozitës apo autoritetit zyrtar nga neni 414 lidhur me nenin 33 të Kodit Penal”, është vepra penale me të cilën ngarkohet i dyshuari Ridvan Muharremi.
Dyshimet ndaj Lipovicës
Irfan Lipovica, Zëvendësekretari i Ministrisë së Financave dhe Transfereve, është i dyshuar tejkalimin e autorizimeve ligjore dhe kërkimin e anashkalimit të procedurave ligjore të prokurimit publik për blerjen e rezervave shtetërore. Prokuroria ka dyshime se Lipovica mund të ketë kërkuar këtë anashkalim me qëllim të kufizimit të konkurrencës dhe për të fshehur shkeljen e ligjit.
Sipas informacioneve të Prokurorisë, në shkurt të vitit 2022, Qeveria ka marrë një vendim të bazuar në kërkesën e paligjshme të Lipovicës për të shkelur procedurat ligjore të prokurimit publik për blerjen e rezervave shtetërore.
Duke vepruar në kundërshtim me ligjin, Lipovica është i dyshuar për formimin e një Komisioni të paligjshëm për Negocimin e Kontratave për Furnizim me Mallra të Rezervave Shtetërore për vitin 2022.
Edhe pse ky komision ishte formuar në kundërshtim me ligjin, sipas Prokuroriasë Lipovica ka anashkaluar dy anëtarët e komisionit dhe ka përfshirë një person të dyshimtë, Ridvan Muharremi, si ndërmjetësues ndërmjet Ministrisë së Financave dhe Operatorëve Ekonomikë nga Turqia për blerjen e grurit.
Sipas dosjes, pavarësisht se janë bërë pagesat e plota me operatorët ekonomik për grurin, vajin dhe sheqerin, në Kosovë është sjellë 52.5 tonë grurë më pak, ndërsa vaji dhe sheqeri nuk janë sjellë fare.
Rezultati i këtyre veprimeve është një dëmtim i interesit publik me një shumë prej 601,940 euro, ka konstatuar Prokuroria.
“Pavarësisht se pagesa në formë të avansit është realizuar në tërësi, në Kosovë, si vend i destinimit, janë sjell vetëm 9.947.5 tonë grurë ose 52.5 tonë më pak se sasia e kontraktuar. Ndërsa, lloji vaji dhe sheqeri nuk janë sjell fare. Si rezultat i këtyre veprimeve është dëmtuar interesi publik në lartësi prej 601 mijë e 940 euro”, ka konstatuar Prokuroria.
Dyshimet ndaj Garës
Pas Irfan Lipovicës, Zëvendësekretarit të Ministrisë së Financave dhe Transfereve, edhe Haviz Gara, Drejtori i Departamentit të Rezervave Shtetërore, është ngarkuar me akuzat për të njëjtën veprimtari të paligjshme.
Gara dyshohet për mosrespektim të procedurave të përcaktuara ligjore, përfshirë edhe anashkalimin e anëtarëve të komisionit të caktuar për këtë qëllim.
Me këtë veprim, sipas Prokurorisë, Ridvan Muharremit i është mundësuar që të luajë rolin e ndërmjetësit në mes të Ministrisë dhe Operatorëve Ekonomikë në Turqi dhe Poloni për procesin e prokurimit.