Deputetja e Partisë Demokratike të Kosovës, Ariana Musliu-Shoshi ka thënë që në takimin me shefin e Zyrës së Bashkimit Evropian në Kosovë, Tomáš Szungyog, ia ka shprehur shqetësimin lidhur me masat e BE-së ndaj Kosovës dhe mundësisë së dështimit të qeverisë kosovare për depërshkallëzimin e situatës në veri të vendit.
“Kjo Qeveri NUK ia di hallin vetes! Në takimin e përbashkët me Shefin e Zyrës së BE-së në Kosovë, z.Tomáš Szungyog, ngrita shqetësimet konkrete që i kemi në rrugën tonë drejt integrimit në familjen evropiane”, ka thënë Musliu-Shoshi.
“Shqetësim yni mbeten masat e BE-së dhe rreziku i përshkallëzimit të këtyre masave në rast se qeveria e Kosovës dështon ta de-eskalojë situatën”.
“Shqetësim tjetër janë kushtëzimet e qeverisë së Kosovës karshi BE-së, ku me fjalë të tjera, kjo qeveri NUK ia di hallin vetes. Nuk është e vetëdijshme për (pa)fuqinë e saj. Nuk është mirënjohëse ndaj vetë BE-së dhe shteteve anëtare të saj për krejt ndihmën e dhënë ndër vite”.
Musliu-Shoshi tha që qeveria duhet të reflektojë mbi obligimet ndërkombëtare dhe kërkesat e BE-së.
“Qartazi, me veprimet e saj dhe sulmet e vazhdueshme ndaj opozitës, mediave, shoqërisë civile e bizneseve kjo qeveri nuk e ka qëllim funksionimin e demokracisë por të zëvendësimit me një regjim tjetër! Rrjedhimisht, kjo rrugë na largon edhe më tepër nga familja evropiane!”
“Prandaj, sa nuk është bërë vonë, qeveria duhet të reflektojë mbi obligimet ndërkombëtare e kërkesat e BE-së, ose, për të mirën e këtij vendi e të ardhmes tonë, vendimi t’i rikthehet vlerësimit të sovranit, i cili ashtu kështu në masë të madhe sipas matjes së fundit, nuk është i kënaqur me drejtimin politik të vendit”.