Zëdhënësi i BE-së, Peter Stano, tha se BE-ja është shumë e shqetësuar për heqjen e dinarit në Kosovë dhe ndikimin që do të ketë dhe ka në komunitetet me shumicë serbe.
“Kjo na shqetëson gjithnjë e më shumë, ndikimi që do të ketë vendimi në komunat me shumicë serbe në Kosovë, dhe veçanërisht në shkollat apo spitalet për të cilat nuk ka një proces alternativ të qëndrueshëm”, tha Stano në një konferencë të rregullt në Bruksel.
Ai vlerësoi se vendimi për shfuqizimin e dinarit do të ketë ndikim të drejtpërdrejtë në jetën e përditshme të shumicës dërrmuese të popullatës serbe, të cilët marrin pagesa apo ndihmë financiare në monedhën serbe.
“Duke marrë parasysh pasojat e mundshme të këtij vendimi në procesin e normalizimit të marrëdhënieve ndërmjet Kosovës dhe Serbisë, presim që të merren parasysh të gjitha aspektet që kanë të bëjnë me komunitetin serb në Kosovë, në përputhje me dialogun e udhëhequr nga BE-ja”.
“Kërkojmë që të përcaktohet një periudhë mjaft e gjatë tranzitore, për të bërë të mundur gjetjen e një zgjidhjeje për këtë problem specifik përmes negociatave”, tha Stano.
Bordi i Bankës Qendrore të Kosovës ditë më parë ka miratuar rregulloren e re për Operacionet me Paratë e Gatshme, e cila do të hyjë në fuqi që nga 1 shkurti.
Sipas kësaj rregulloreje, valuta e vetme që lejohet të përdoret për kryerje të transaksioneve të pagesave me para të gatshme dhe në sistemin e pagesave në Kosovë, është Euro.
“Valuta e vetme e lejuar të përdoret për kryerjen e transaksioneve të pagesave me para të gatshme dhe në sistemin e pagesave në Republikën e Kosovës është euro, si valutë e vetme edhe në kuptim të Nenit 11 të Kushtetutës së Republikës së Kosovës dhe Neneve 16, 17 dhe 18 të Ligjit Nr. 03/L-209 për Bankën Qendrore të Republikës së Kosovës”, thuhet në rregullore.
Ndërkaq, sa i përket valutave tjera, BQK ka vendosur që të përdoren “vetëm si vlera për ruajtje në formë fizike apo në llogarite bankare në valuta jo euro, për kryerjen e pagesave ndërkombëtare në valuta jo euro dhe për aktivitetet e këmbimit valutor”.
Duke e përmendur Euron si valutë të vetme, Kosova me gjasë përjashton edhe dinarin si valutë për kryerjen e pagesave me para të gatshme dhe në sistemin e pagesave që përdoret në mjediset serbe pandërprerë edhe pse nga viti 2002 Kosova ka adoptuar euron si valutë të saj