Qindra tifozë të Trepçës janë parë duke pritur në radhë të gjatë përkundër motit me shi në Mitrovicë, në përpjekje për të marrë biletë për finalen e parë kundër Pejës në Superligën e basketbollit kosovar.
Trepça e pret sonte Pejën në palestrën Minatori në Mitrovicë për ta hapur serinë e finaleve të play-off’it të këtij sezoni.
Tifozët mitrovicas kanë treguar edhe një herë rëndësinë që i kushtojnë klubit të tyre të basketbollit duke i mbushur radhët për bileta.
Megjithëse biletat nuk dolën në shitje deri në orën 11:00, qindra njerëz u mblodhën herët në mëngjes pranë pikës së shitjes së biletave duke e shpërfillur edhe shiun.
Trepça e mundi Prishtinën 3:2 në një gjysmëfinale dramatike me pesë ndeshje për të kaluar në finale kundër favorites Peja.
Klubi mitrovicas është tri herë kampion i Kosovës por nuk e ka fituar titullin që 11 vite.
Këtë vit, Trepça e synon titullin e parë në Superligë që nga sezoni 2011/2012 dhe ka përparësinë e terrenit vendas dhe tifozëve të zjarrtë rrjedhimisht për ta bërë këtë.
Titullin e fiton klubi që i fiton tri ndeshje nga pesë të mundshme dhe Trepça mund t’i luajë tri prej tyre në palestrën e vet nëse seria shkon në pesë ndeshje.
