Eksperti shqiptar i çështjeve të sigurisë, Ilir Kulla, kritikon Bashkimin Evropian për mungesë konsensusi ndaj Serbisë. I konsideron absurde masat ndaj Kosovës, pasi thotë se Serbia është kërcënimi real për gjithë rajonin e Ballkanit, e lëre më për Kosovën.
Në intervistën për KosovaPress, Kulla thotë se është Serbia që po e përdorë Asociacionin për të bërë një shtet serb brenda Kosovës, ndërkohë që nuk ofron njohjen.
Ai thekson se Lista Serbe është ajo që ka dëmtuar serbët e Kosovës.
Eksperti i sigurisë flet edhe për interesin e Rusisë për të destabilizuar Ballkanin, teksa shton se është presidenti serb, Aleksandër Vuçiq ai i cili qëndron prapa agresionit ndaj Kosovës.
Sipas tij, Serbia po e përdorë Asociacionin e komunave me shumicë serbe për të formuar një shtet serb brenda Kosovës.
“Asociacioni ka vetëm një formulë, asociacioni kundër njohjes. Pra në momentin që më jep njohjen unë të jap asociacionin. Përderisa nuk më jep njohjen dhe përdor asociacionin për të futur, për të krijuar një shtet serb në Kosovë, nuk ka arsye pse të ekzistoj ky Asiosacion”, thotë Kulla.
Derisa flet për agresionin e Serbisë ndaj Kosovës ku më 24 shtator mbeti i vrarë polici Afrim Bunjaku dhe u plagosën dy të tjerë, ish-ministri shqiptar thotë se ekziston rreziku që serbët të përdorin enklavat për t’u viktimizuar si në rastin “Panda”, në Pejë.
Ai komenton edhe arrestimin dhe lirimin e të sanksionuarit të ShBA-së dhe Britanisë së Madhe, Milan Radojiciq nga Serbia, i cili kishte pranuar se qëndron prapa grupit terrorist që sulmoi Policinë e Kosovës në Banjskë.
Ai nuk mohon interesin e Serbisë për të destabilizuar Ballkanin, derisa vë në pa edhe veprimtarinë e Listës Serbe.
Sa i përket tolerancës së ndërkombëtarëve ndaj Serbisë, Kulla thotë se vjen si rezultat i frikës që kjo e fundit do të afrohet edhe më shumë me Rusinë.
Krejt në fund, Kulla thotë se për Kosovën është e rëndësishme të vazhdojnë njohjet e reja dhe që të mos mungojë vullneti politik për propozime konkrete në çështjet e rëndësishme për vendin.