Shërbimi Spitalor Klinik dhe Universitar i Kosovës, ka reaguar pas arrestimit të mjekut të QKUK’së në dyshimin për marrje ryshfeti.
SHSKUK ka thënë se e kanë pranuar lajmin me shqetësim, duke shtuar se drejtoria do të ndërmarrë të fjitha veprimet ligjore.
“Drejtoria e ShSKUK-së është duke e përcjellë me vëmendje këtë situatë dhe do të ndërmarr të gjitha veprimet ligjore. Shkelësit e ligjit nuk kanë vend në institucionet publike shëndetësore. Ftojmë të gjithë qytetarët që të bashkëpunojnë dhe të raportojnë raste të parregullsive.”, thuhet në reagim.
Prokuroria e Shtetit sot ka njoftuar se ka urdhëruar ndalimin e një mjeku të QKUK-së, të dyshuar për marrje të ryshfetit.
”Prokuroria Themelore në Prishtinë, njofton opinionin publik se Departamenti për Krime të Rënda, konkretisht Njësiti për Krime Ekonomike dhe Korrupsion, ka urdhëruar ndalimin e personit me inicialet S.D., në cilësinë e mjekut në Qendrën Klinike Universitare të Kosovës (QKUK), për shkak të dyshimit se ka kryer veprën penale “Marrja e ryshfetit”, sipas KPRK-së”, thuhet në njoftim.