Komisioni për Politikë të Jashtme i Bundestagut Gjerman pranoi për shqyrtim kërkesën e qeverisë gjermane për vazhdimin e mandatit të ushtarëve gjermanë në misionin e KFOR-it në Kosovë, ku thuhet se prioriteti kryesor i Berlinit është “normalizimi gjithëpërfshirës, i qëndrueshëm, ligjërisht i detyrueshëm i marrëdhënieve ndërmjet Kosovës dhe Serbisë”.
“Bundestagu do të marrë pjesë në prezencën ndërkombëtare të sigurisë në KFOR të Kosovës për një vit. Si më parë, për këtë duhet të dërgohen deri në 400 ushtarë”, thuhet në kërkesën e qeverisë gjermane, të cilën Bundestagu do ta diskutojë për herë të parë të enjten e javës së ardhshme.
Sipas vendimit të Qeverisë, detyrat e ushtarëve gjermanë përfshijnë, përveç kontributit për një mjedis të sigurt dhe garancinë e sigurisë dhe rendit publik dhe mbështetjen e “zhvillimit të një Republike të Kosovës stabile, demokratike, multietnike dhe paqësore”, mbështetjen e krijimit të Forcave të Sigurisë së Kosovës si “një organizatë e sigurisë e kontrolluar në mënyrë demokratike, multietnike dhe akterë të tjerë si pjesë e reformës së sektorit të sigurisë në përgatitje për integrim të mëtejshëm në strukturën euroatlantike”.
Në kërkesën e Qeverisë theksohet se gjendja e sigurisë në veri të Kosovës me popullatë kryesisht serbe është shënuar me tensione në rritje nga viti 2022.
Konkretisht, përleshjet e dhunshme në komunën veriore të Zveçanit në maj të vitit 2023, në të cilat u plagosën shumë ushtarë dhe personel civil të KFOR-it, disa rëndë, çuan në përshkallëzim të situatës në veri të Kosovës.
“Tensionet politike vazhduan në fillim të vitit 2024, duke përfshirë çështjen e zgjedhjeve të reja të mundshme për kryetarët e katër komunave veriore dhe rregulloret për transaksionet e pagesave ndërmjet Serbisë dhe Kosovës”, thuhet në tekst.
Prioriteti kryesor i qeverisë gjermane është “normalizimi gjithëpërfshirës, i qëndrueshëm, ligjërisht i detyrueshëm i marrëdhënieve ndërmjet Kosovës dhe Serbisë” dhe, në mënyrë bilaterale në lidhje me Kosovën, stabilizimi politik, kushtetues dhe ekonomiko-social dhe mbështetja për afrimin me BE-në, thuhet në njoftim.
Baza e misionit të KFOR-it, shtoi ajo, është ende Rezoluta 1244 e Këshillit të Sigurimit të Kombeve të Bashkuara, e cila vazhdon të zbatohet.
Si Kosova, ashtu edhe Serbia gjithmonë e kanë bërë të qartë se dëshirojnë që prania e KFOR-it të vazhdojë, thuhet në kërkesën e qeverisë gjermane.
Qeveria gjermane vlerëson kostot e vazhdimit të pjesëmarrjes së ushtarëve gjermanë në KFOR në rreth 21.8 milionë euro.