Mediumi amerikan shumë i njohur globalisht, CNN, ka shkruar një artikull të gjatë në lidhje me Serbinë, Aleksandar Vuçiqin, dhe diplomacinë amerikane dhe evropiane. Në këtë shkrim të gjatë, CNN ka kritikuar Vuçiqin, duke e quajtur atë kalë trojan rus, ndërsa Serbinë e ka cilësuar si aleate tradicionale të Rusisë në Evropë. Çka shkroi CNN?
Artikulli fillon duke dhënë një kontekst të diplomacisë amerikane dhe evropian pas pushtimit rus të Ukrainës. Sipas shkrimit, kur Rusia pushtoi Ukrainën, ShBA-ja dhe BE-ja përshpejtuan orientimin e tyre drejt Serbisë. Tutje, sipas CNN, kjo politikë kishte dy synime.
“Politikat e tyre kishin dy synime. Së pari, për ta futur Serbinë në vathën perëndimore, larg Rusisë. Së dyti, të lejojnë administratat e tyre përkatëse të fokusohen plotësisht në mbështetjen e Ukrainës.” – shkruan CNN.
Në këtë artikull të gjatë, Beogradi zyrtar cilësohet si aleat tradicional dhe i afërt me Moskën.
“Tradicionalisht një nga aleatët më të afërt të Moskës në Evropë, Beogradi është përpjekur prej kohësh të shkelë kufirin midis lidhjeve të tij historike me Rusinë dhe një të ardhmeje të mundshme të integrimit më të ngushtë evropian. Diplomatët perëndimorë kanë kërkuar të tërheqin presidentin serb Aleksandar Vuçiq nga orbita e homologut të tij rus, presidentit Vladimir Putin, duke u zotuar për një rrugë më të shpejtë drejt anëtarësimit në BE, duke paralajmëruar njëkohësisht për izolim nëse shkelet “rangu”.” – shkruan tutje CNN.
Në artikull citohet edhe Jasmin Mujanoviq, analist politik i specializuar në Ballkanin Perëndimor, i cili i ka quajtur politikat e Vuçiqit si “veçanërisht të pafytyra”.
“Ndërsa administratat e njëpasnjëshme amerikane janë përpjekur të “integrojnë” Vuçiqin dhe partinë e tij Progresive Serbe (SNS), këto përpjekje “janë bërë veçanërisht të pafytyra” që nga fillimi i luftës në Ukrainë, tha Mujanoviq duke shtuar se nuk i kanë arritur objektivat e SHBA-së.” – vazhdon shkrimi i CNN.
Në shkrim denoncohet edhe marrëdhënia komode mes Vuçiqit dhe homologut të tij rus, Vladimit Putin.
“Vuçiqi ka mbajtur prej kohësh një marrëdhënie komode me homologun e tij rus, Putin. Duke folur pas një takimi të Këshillit të Sigurisë Kombëtare në shkurt, Vuçiqi e arsyetoi vendimin e tij për të mos sanksionuar Rusinë sepse ishte “i vetmi vend që nuk kishte vendosur sanksione kundër nesh në vitet 1990”.” – shkruan CNN.
Ndërsa Serbia konsiderohet si e varur nga Rusia në aspektin energjetik, pasi ka shitur shumicën e aksioneve të kompanisë së saj të naftës gjigantit shtetëror rus Gazprom.
“Rezultati është se, pavarësisht nga shpresat e deklaruara të Serbisë për t’u bashkuar me BE-në, Vuçiqi ka vazhduar të ecë në një litar të ngushtë midis Moskës dhe fuqive perëndimore. Megjithëse ai i është bashkuar rezolutës së OKB-së që dënon pushtimin e Rusisë në Ukrainë, udhëheqësi i Serbisë ka treguar pak vullnet për t’iu bashkuar sanksioneve perëndimore.” – theksohet në shkrim.
Në fund të artikullit, CNN shtron një dilemë nëse Vuçiqi ishte një kali i gabuar i ShBA-së dhe BE-së.
“Gjatë gjithë muajve të fundit të tensioneve, SHBA-ja dhe BE-ja kanë përsëritur vazhdimisht angazhimin e tyre për kauzën e sjelljes së Vuçiqit në krah. Por Serbia ka vepruar krejtësisht kundër këtij drejtimi, duke përfaqësuar atë që Kearns e quajti “një dështim të diplomacisë parandaluese”.” – shkruan CNN./Nacionale