Policia në Shqipëri ka ndaluar dy persona nga Gjilani në pikën kufitare në Morinë dhe u ka sekuestruar 28 mijë e 500 euro të cilat nuk i kishin deklaruar.
Në njoftimin e policisë shqiptare bëhet e ditur se nga D.R, 24 vjeç, janë sekuestruar 12 mijë e 400 euro ndërsa nga D.Sh, 20 vjeç, janë sekuestruar 16 mijë e 100 euro,.
Rasti ka kaluar në procedurë të rregullt ndërsa paratë e sekuestruara janë referuar Prokurorisë pranë Gjykatës së Rrethit Gjyqësor në Kukës për veprime të mëtejshme.
Njoftimi i plotë i Policisë së Shtetit:
Vijojnë kontrollet intensive nga Policia Kufitare, për goditjen e krimeve ndërkufitare. Goditen 2 raste të mosdeklarimit të të hollave në kufi. Sekuestrohen 28 500 euro, procedohen penalisht dy shtetasit që nuk i deklaruan në PKK Morinë.
Shërbimet e Policisë Kufitare në Morinë, në vijim të kontrolleve për evidentimin dhe goditjen e krimeve ndërkufitare, bazuar dhe në analizën e riskut, në hyrje të RSH-së, kanë kaluar në vijën e dytë, për kontroll më të imtësishëm, automjetin tip “Volkswagen”, me drejtues shtetasin D. R. dhe pasagjer shtetasin D. Sh.
Gjatë kontrollit fizik, shërbimet e Policisë i kanë gjetur shtetasit D. R., 12 400 euro, ndërsa shtetasit D. Sh. i kanë gjetur 16 100 euro, të padeklaruara sipas përcaktimeve ligjore në fuqi. Në cilësinë e provës materiale u sekuestruan 28 500 euro.
Në përfundim të veprimeve hetimore, specialistët e Seksionit për Hetimin e Krimeve Ekonomike e Financiare të DVP Kukës referuan materialet në Prokurori dhe nisi procedimi në gjendje të lirë për shtetasit D. R., 24 vjeç dhe D. Sh., 20 vjeç, banues në Gjilan, Kosovë, për veprën penale “Mosdeklarimi në kufi i të hollave dhe i sendeve me vlerë”. Materialet iu referuan Prokurorisë pranë Gjykatës së Rrethit Gjyqësor Kukës, për veprime të mëtejshme.